A do të thotë se deklarata e numrit një të VMRO-DPMNE-së, Hristijan Mickoski, për gatishmërinë e kësaj partie për të ndryshuar Kushtetutën, përkundër kushtëzimeve të tij, se e djathta maqedonase po esëllohet dita-ditës?
Shkup, 8 qershor/indeks.mk-“Një vendim jo i papritur, po të kihet parasysh kredoja politike e kreut të integristëve, Ali Ahmeti. BDI-ja e shfrytëzoi këtë momentum për të konfirmuar përcaktimet e veta programore për ta bërë vendin anëtar me të drejta të plota të Bashkimit Evropian dhe duke lënë të kuptohet se për të parësore është shteti (me hisen shqiptare në të) e jo mbajtja me çdo kusht e pushtetit”.
Kështu e komenton gazetari Seladin Xhezairi nga Instituti Ballkanik për Bashkëpunim Rajonal (BIRC) gatishmërinë e BDI-së që të largohet nga pushteti me qëllim që të arrihet kompromis politik që vendi të realizojë ëndrrën e shumë gjeneratave dhe synimin strategjik për anëtarësim në Bashkimin Evropian (BE).
“Deklarata se ‘BDI është e gatshme të mbështesë një Qeveri pa BDI deri në zgjedhje, nëse opozita i përkrah ndryshimet kushtetuese të cilat duhet të hyjnë në fuqi para formimit të asaj qeverie. E ardhmja evropiane e qytetarëve është e para’- nuk më duket boshe. Tjetër është diskursi mbizotërues tek shumica e partive politike maqedonase, të cilat bien e zgjohen nga gjumi me ëndrrat për ta çuar partinë e Ahmetit në opozitë! Them që të gjitha forcat politike, maqedonase e shqiptare, pozitare e opozitare, të cilat kanë pak hapësirë manovrimi për të anashkaluar reformat, e pse jo edhe parakushtet për të çuar përpara procesin e integrimit evropian të vendit. Deklarata e numrit një të VMRO-DPMNE-së, Hristijan Mickoski, për gatishmërinë e kësaj partie për të ndryshuar Kushtetutën, përkundër kushtëzimeve të tij, provon se e djathta maqedonase po esëllohet dita-ditës, në kuptimin e veprimit me këmbë në tokë, ama si duket e ka vështirë të heqë dorë nga retorika me ngjyrime antishqiptare! Fundja, do të ishte mirë që VMRO-DPMNE-ja të presë rezultatin e zgjedhjeve e pastaj të mbajë qëndrim pro- kësaj apo contra – asaj partie politike shqiptare! Tash si po pozicionohet i bie se hesapet i bën pa hanxhinë! Ndaj them se reagimi i BDI-së ishte politikisht e partiakisht – goditës!”, deklaroi Xhezairi për Indeks.mk
Kryeministri dhe lideri i LSDM-së, Dimitar Kovaçevski dhe lideri i VMRO-DPMNE-së, Hristijan Mickoski, në takimin e të mërkurës kanë biseduar për ndryshimet kushtetuese, por nuk është arritur marrëveshje konkrete.
Sipas kreut të VMRO-DPMNE-së, kryeministri propozoi një qeveri të gjerë me pesë ministra të opozitës, ndërsa Mickoski kërkon një qeveri në të cilën BDI nuk do të marrë pjesë. Ai kërkon garanci nga BE për ndryshimet kushtetuese, të cilat sipas tij duhet të hyjnë në fuqi pas anëtarësimit në BE.
PROPOZIMI I KOVAÇEVSKIT
Në takim, kryeministri Dimitar Kovaçevski i propozoi opozitës që të votojnë së bashku ndryshimet kushtetuese, pasi mendon se kjo është zgjidhja reale që qytetarët presin prej tyre.
“Nëse i votojmë të gjithë bashkë ndryshimet kushtetuese, atëherë menjëherë pas votimit mund të shkojmë në zgjedhje. Gjatë periudhës së kaluar kam kuptuar se është e rëndësishme që ata të jenë pjesë e qeverisë dhe të tregojnë se ne si qeveri nuk jemi të orientuar drejt marrjes së pikëve politike vetëm për veten tonë dhe se nuk udhëhiqemi nga interesat tona partiake, si dhe nuk jemi të fokusuar vetëm në rezultatin e zgjedhjeve të ardhshme, sugjerova që bashkërisht të votojmë hapjen e Kushtetutës me dy të tretat dhe që nesër menjëherë të hyjë VMRO-DPMNE në Qeveri, me LSDM-në, t’i lëmë gjysmën e mandateve përfaqësuesve të VMRO-DPMNE-së”, tha Kovaçevski.
Në këtë mënyrë, kryeministri beson se do të sigurojnë një qeveri që bashkon dhe bashkon të gjitha partitë politike që janë pro integrimeve evropiane.
Lidhur me kërkesën e opozitës që disa parti të mos jenë pjesë e qeverisë, Kovaçevski thotë: “Na duhet një qeveri që do të jetë një bashkim i gjerë i të gjithëve, që do të ketë një qëllim të qartë. Do të jetë një qeveri e bashkimit, e integrimit evropian dhe nuk do të jetë një qeveri e izolimit dhe destabilizimit, skenarë të tjerë mund të çojnë në rezultate të tjera në shoqëri”.
VMRO-DPMNE DËSHIRON TË HYJË NË QEVERI, POR PA BDI-në
Mickoski doli me kundërpropozim ndaj këtij propozimi. VMRO-DPMNE është e gatshme të hyjë në qeveri me LSDM-në dhe partitë tjera politike, por pa pjesëmarrjen e Bashkimit Demokratik për Integrim. Kjo ide, siç u deklaruan nga kjo parti, është e pranueshme!
BDI përmes ministrit të Punëve të Jashtme dhe zëdhënësit të partisë, Bujar Osmani, në Facebook ka njoftuar se janë të gatshme të mbështesin qeverinë pa BDI-në deri në zgjedhje nëse opozita i përkrah ndryshimet kushtetuese dhe ato të hyjnë në fuqi para formimit të asaj qeverie.
“E ardhmja evropiane e qytetarëve është mbi të gjitha!”, thotë Osmani.
Edhe Partia Liberal Demokratike (PLD) është e gatshme të pranojë hyrjen e VMRO-DPMNE-së në koalicionin qeverisës nëse opozita i përkrah ndryshimet kushtetuese. Sipas kryetares së PLD-së, Monika Zajkova, e ardhmja evropiane e qytetarëve është më e rëndësishmja.
“E ardhmja evropiane e qytetarëve është më e rëndësishmja dhe sigurisht progresi i Maqedonisë së Veriut në negociatat me Bashkimin Evropian dhe hapjen e klasterave. Dhe pikërisht për këtë mirëpresim disponimin e VMRO-DPMNE-së në zgjedhjen e tyre për të dhënë mbështetje në proceset integruese evropiane dhe për të votuar për ndryshimin e Kushtetutës. Është mirë që VMRO-DPMNE nuk është kundër ndryshimeve kushtetuese, por ato duhet të hyjnë në fuqi para formimit të qeverisë në të cilën do të anëtarësoheshin si parti opozitare. Të gjithë së bashku e kemi përgjegjësinë se në cilën rrugë do ta lëvizim vendin dhe çfarë standardi do t’u ofrojmë qytetarëve”, thotë Zajkova.
DERA E BE-SË ËSHTË E HAPUR, NËSE BËHEN NDRYSHIMET KUSHTETUESE
Ambasadori i BE-së, David Gir, në emisioni “Click Plus” në TV21 tha se dera e Maqedonisë për në Bashkimin Evropian është e hapur, por nëse bëhen ndryshimet kushtetuese.
“Ndryshimet kushtetuese janë një problem i madh. Është çështje sovraniteti për shtetin. Por unë mendoj se disa elementë do të jenë veçanërisht të rëndësishëm dhe do të duhet të merren parasysh pasi propozimi të publikohet dhe të bëhet i disponueshëm për publikun. Nëse më lejoni, do të filloj me ndryshimet kushtetuese, të cilat ju i përmendët tashmë. Mendoj se mbi të gjitha, koha dhe konteksti janë kyçe këtu. Vitin e kaluar në korrik, ne filluam negociatat e anëtarësimit me Maqedoninë e Veriut. Deri më tani, procesi po shkon mirë. Procesi është në vazhdim, ekipet janë të organizuara mirë dhe shoh ndryshime pozitive. Ka një nxitim. Ka nxitim për zgjerim dhe të gjithë tani e kuptojnë seriozitetin e interesit për të ecur përpara në procesin e zgjerimit të BE-së. Mendoj se tani ka shans të madh. Në këtë moment dera është e hapur nëse bëhen ndryshime kushtetuese. Kështu shteti do të kalojë në hapin tjetër”, thotë Gir.
Sipas tij, është çështje sovraniteti dhe kemi një mundësi të madhe që nuk duhet humbur.
“Përndryshe nuk do të ketë përparim”. Sigurisht, do të jetë e rëndësishme që njerëzit të lexojnë atë që do të shkruhet në tekst dhe të fokusohen në të. Duket se ka mënyra për të përfshirë në Kushtetutë personat që deklarohen si bullgarë. Ju tashmë keni marrëdhënie të mira ndëretnike. Kjo vetëm do t’i forcojë ato. Mund të thuhet se do t’i mbështesni fjalët tuaja me veprimet tuaja”, tha Gir. (Indeks.mk)
