Kështu Pol Pogba e nis intervistën e tij për “L’Equipe” dhe flet pas reduktimit të dënimit për përdorimin e dopingut nga 4 vite në 18 muaj.
Ai e nis me ndjesitë e tij të para pasi u zyrtarizua dënimi me 18 muaj. “Pata një ndjesi sikur mu dha një tjetër mundësi, sikur rifitova diçka që ma kishin hequr nga duart. Tani kam një tjetër perspektivë për jetën. Marsi do të vijë shumë shpejt”, shprehet fillimisht mesfushori francez që do të kthehet në fushën e lojës sërish pas 5 muajsh.
Në merkato është përfolur menjëherë për skuadrat ku mund të transferohet pasi të zgjidh kontratën me Juventusin. Një prej tyre është edhe Marseja. “Kjo gjë më bën për të qeshur sepse e di që e ka bërë “dajo” Patrik Evraja. E njoh shumë mirë. Unë nga ana tjetër jam ende nën kontratë me Juventusin, nuk mund të besoj asnjë fjalë merkatoje.
A kam menduar që të luaj në kampionatin francez? Jo. Jam pjesë e një klubi, kur u dënova mendoja vetëm si të dilja nga kjo situatë. Megjithatë, nuk e dimë se çfarë na sjell e nesërmja. Pse të mos luaj në kampionatin francez”.
Në fund mesfushori flet edhe për objektivat që i ka vendosur vetes. “Objektivi im mbi të gjitha është të rikthehem në formë sepse u bë një kohë e gjatë që nuk po luaj. Nuk është se do të rikthehet Pol Pogbaja që fitoi Kupën e Botës me Francën dhe ulte mesfushorët e tjerë në stol”, përfundoi Pogba.
