Një shkollë në Turqi do të emërtohet “Maqedonia” në shenjë mirënjohjeje për solidaritetin pas tërmetit

Në qytetin turk Malatya, i cili ishte një nga të prekurit nga tërmeti katastrofik në Turqi në shkurt të këtij viti, do të ndërtohet një shkollë që do të mbajë emrin e vendit tonë dhe klasat, 32 në numër, do të marrin emrin e Qyteteve të Maqedonisë, përcjellë Klan M, njofton Kryqi i Kuq i Maqedonisë.

Shkolla do të ndërtohet me pjesën më të madhe të mjeteve që qytetarët e Maqedonisë dhuruan për aksionin humanitar të Kryqit të Kuq për të ndihmuar popullatën e vuajtur në Turqi dhe Siri.

“Në fushatë janë mbledhur gjithsej 63.380.807 denarë. Prej tyre, 12.427.334 denarë janë dërguar në llogarinë e Federatës Ndërkombëtare të Kryqit të Kuq dhe Gjysmëhënës së Kuqe, për të ndihmuar popullatën e vuajtur në Siri”, njoftuan nga Kryqi i Kuq i Maqedonisë.

Pjesa e mbetur prej 50.909.796 denarë, por sipas marrëveshjes së Kryqit të Kuq të vendit dhe Gjysmëhënës së Kuqe Turke, është vendosur që të ndahen për ndërtimin e shkollës në Malatya të Turqisë.

“Ky akt do të lërë gjurmë të qëndrueshme dhe dëshmi të solidaritetit të qytetarëve të RMV-së ndaj qytetarëve të Republikës së Turqisë. Qytetarët dhe publiku i gjerë herë pas here do të mund të informohen për ecurinë e ndërtimit të shkollës dhe investimin në ueb faqen e Kryqit të Kuq”, thonë nga organizata.

Turqia dhe Siria u goditën nga një tërmet katastrofik më 6 shkurt të këtij viti që vrau mijëra njerëz dhe la mijëra të tjerë të plagosur dhe të pastrehë. /KlanMacedonia/

Share

About Us

Follow Us

Copyright 2023. All Rights Reserved.