Tre persona të rinj janë arrestuar për sulmin kundër gazetarit Valon Syla, që ndodhi të martën mbrëma në Prishtinë.
Të dyshuarit janë Lum Dervishi, Kenan Hasani dhe Okan Hasani.
Ministri Xhelal Sveçla njoftoi pak minuta më parë se se tre të dyshuarit për sulmin fizik ndaj gazetari Syla, janë arrestuar djet.
“Pas një pune intensive të Policisë së Kosovës, tashmë janë arrestuar tre sulmuesit e gazetarit Valon Syla. Përgëzoj Policinë e Kosovës për përkushtimin dhe profesionalizmin që garanton siguri për të gjithë si dhe sundim të rendit dhe ligjit”, ka shkruar i pari i MPB-së në Facebook.
Prokuroria Speciale dhe Policia e Kosovës dje kanë dalë me komunikatë të përbashkët lidhur me rastin e sulmit ndaj gazetarit Valon Syla. Aty bëhet e ditur se ndaj tri personave që janë të dyshuar për sulmin, rëndohet akuza e kryerjes së veprës penale “Nxitje e përçarjes dhe mosdurimit” si dhe ceket fakti se rasti po hetohet nga Drejtoria Kundër Terrorizmit.
Kjo është komunikata e përbashkët:
KOMUNIKATË E PËRBASHKËT NGA PROKURORIA SPECIALE DHE POLICIA E KOSOVËS
Arrestohen tre persona të dyshuar për sulm fizik ndaj gazetarit Valon Syla
Prishtinë, 12 prill 2023 – Me urdhër të Prokurorisë Speciale të Republikës së Kosovës (PSRK), Policia e Kosovës, ka arrestuar tre persona të cilët kanë sulmuar gazetarin, Valon Syla.
Prokuroria Speciale njofton se pas një angazhimi intensiv të hetuesve të Policisë së Kosovës, përkatësisht Drejtorisë Kundër Terrorizmit, është arritur që të identifikohen tre (3) të dyshuarit, për rastin e sulmit fizik të datës 11.04.2023, ndaj gazetarit Valon Syla, arrestimi i të cilëve është realizuar sot me datë 12.04.2023.
Të arrestuarit janë personat e dyshuar me inicialet L.D, K.H dhe O.H. si dhe të njëjtit dyshohen se kanë kryer veprën penale ‘’Nxitje e përçarjes dhe mos durimit’’.
Tre të arrestuarit me urdhër të Prokurorit të Shtetit, do të dërgohen në mbajtje, si dhe brenda afateve ligjore do të kërkohet caktimi i masës së paraburgimit.
