Klubi bullgar “Car Boris III” nga Ohri është fshirë nga Regjistri Qendror, pasi më herët ministri i Drejtësisë, Krenar Lloga ka nënshkruar vendimin që shoqatës i ndalon përdorimin e emrit të këtij personi kontrovers.
Ministri Lloga nënshkroi rezolutën për mospërputhje në bazë të mendimit negativ të marrë nga Komisioni për përdorimin e emrave personalë për përdorimin e emrit “Car Boris III” në emër të Shoqatës për Afirmimin e Vlerave Kulturore të bullgarëve në Maqedoni.
Ministria e Drejtësisë bëri me dije se Komisioni konsideron se emërtimi i mundshëm i shoqatës me një emër të tillë shkakton tensione dhe intolerancë në mbarë shoqërinë maqedonase dhe se ata veprojnë në përputhje me dispozitat e Ligjit për shoqata dhe fondacione duke marrë parasysh mendimin e Komisionit dhe më pas njoftoi se Vendimi do t’i dorëzohet Regjistrit Qendror të Republikës së Maqedonisë së Veriut për përpunim të mëtutjeshëm./Telegrafi/
