Ajo u vra në mes të rrugës teksa po kthehej nga puna për në shtëpi. Viktima është Klodiana Vefa, një vajzë shqiptare 35-vjeçare me leje qëndrimi të rregullt në Itali. Vrasja ka ndodhur mbrëmjen e kësaj të enjteje në një rrugë periferike të Castelfiorentino të Firencës pak pas orës 20.00. Alarmi u dha nga disa banorë të zonës, të cilët dëgjuan të shtënat e armës.
Fakti është se autori ka nxjerrë një armë dhe e ka qëlluar me një plumb në kokë. Një ekzekutim i pastër sipas rikonstruksioneve të para të karabinierëve që tashmë janë në kërkim të burrit të gruas shqiptare. Për momentin ai ka humbur gjurmët dhe nuk jeton më me viktimën. Karabinierët kanë nisur të intervistojnë disa persona, mes të cilëve edhe dy djemtë e viktimës.