Vetëm një ditë pasi ministrja e Energjetikës Sanja Bozhinovska nga radhët e VMRO-PDMNE-së refuzoi t’ia japë mediave dokumentin me të cilin pretendon se ka paraqitur kërkesë për anulimin e shtetësisë bullgare, agjencia bullgare e lajmeve BGNES ka marrë informacione nga burime të Ministrisë bullgare të Drejtësisë se Bozhinovska nuk ka dekret për heqjen e shtetësisë.
Nga aty shtojnë se Bozhinovska ende është shtetase bullgare.
Në konferencën e djeshme për media, e pyetur nëse me dokumente mund të konfirmojë se nuk është më shtetase bullgare dhe nëse ka vetëdije bullgare, Bozhinovska u përgjigj vetëm se do të konsultohet me një avokat.
Mediat shkruanin për shtetësinë bullgare edhe kur Bozhinovska ishte propozuar për ministre të Energjetikës.
Më pas ajo pretendoi se nuk kishte më nënshtetësi bullgare dhe se e kishte për kompaninë e saj në Kroaci.
